जिउ खबाम

जिउ खसाब गान्दोंमोन आईनि गोर्बोयाव

बेनो जिउ, बिग्रायलु समनि गोसोयाव

जेराव सोर्गिदिं अर आरो अर

खामग्लिनाय, थागोन बेबायदिनो गोबां सम

रोहो-रोहो खामग्लिनोनै

जेब्लासिम, लुबैनायखौ लुबैनायजों

सुफुंनो हाया

बोसोर आरो बोसोर,

नेनानै थानांगोन अरायबो

जिउ लैथोयाव गुथाल फैनायखौ नेनानै

सिमांफुरियाव आबिरनि बारहुखा फैजासिम

हरसे मानि हाथर्खि बालन्दाखौ नेयै-नेयै

मेगनाव गोदै मोदै ज्राम गजासिम॥

आं फिन सिरि मोनासै

खन्थाईनि बिदै नागिरै-नागिरै
आं उन्दु लांदोंमोन
निरिबिलि सिमांनि आन्दो-आन्दो
black and white celluloid आव
बोजादोंमोन सावगारिफोर बायदि-बायदि
फुदला गाब
गाब गैयै आलायारन।
दानिया आं सिरि मोनासै
सिमांयावबो
celluloidनि सावगारिफोरा
गाब फुन्दादोंनो
मुगाजों लोगोसे रं-बेरं गेलेदोंनो
आं नुनो मोनासै

आं फिन सिरि मोनासै॥

स्वाननि गोजोनग्लु एम

सोनाब फैसालिनि लामाखौ आंनोबो दिन्थिहर
हे महर गोसा स्वान
नों हारसिंयै दा थांसै
आंबो थांफागौमोन
दसे दलरै जिरायहैनो
गोजोनै.......
नोंनि निन्द बेरेमोदै
नोंनि गोजोनग्लु एमाव ।

आंनि सिमां गैलिया

सोरजिनि गुस्तिआव

आंनि मोफ्लामसे मिनिनाय

उफ्लेनाई गोसोखौ बुरखायनो

बेरायग्लांदो मेगन मिसेबनानै दसे

सिमांनि मुस्रि बोनो।

रानलांनाय बिबारयादि

दिनै मोदोमनाय होलिया

बेंखन ना दोनजानाय

अन्नायनि लैथोआ

नाथाय दिनैबो

जावले-जावले

माबा गोमाजानानै

आंनि सिमांयाव फैलिया॥